Nova sección: receitas

Hai algún tempo que o pai dunha das nosas alumnas fixo unha suxerencia para o blogue. Esta non era outra que introducir unha sección na que o noso equipo de cociña aportara receitas dos pratos que os  rapaces toman no comedor. Pareceunos unha idea moi boa e por iso hoxe inauguramos esta sección, que esperamos que poida ser de utilidade para vós.

LOMBO DE PORCO A LARANXA (4 persoas)

INGREDIENTES:

-Cinta de lombo enteira (500 g)

-Cebola (2)

-Porro (1)

-Cenoria (5)

-Laranxas (dous vasos de zume)

-Aceite ó gusto

-Viño branco ó gusto

-Sal, pementa ó gusto

-Maicena

-Champiñóns laminados

ELABORACIÓN:

Picamos as verduras e cubrimos a bandexa do forno con elas. Colocamos o lombo nesta cama e rociamos con aceite, viño branco e salpementamos ó gusto.

Prequentamos o forno uns minutos a 180ª C. Cando estea coa temperatura adecuada introducimos a bandexa que tiñamos previamente preparada e deixamos asar durante unha hora e media aproximadamente ata conseguir un ton dourado.

Retiramos a bandexa e reservamos as verduras e o seu xugo para posteriormente trituralas.



 



 Deixamos enfriar o lombo para logo proceder a cortalo en toros.

PARA A SALSA:

Facer zume de laranxa e reservar. Trituramos as verduras e pasámolas por un chinés. Nunha cazola engadimos as verduras tamizadas co seu xugo e un pouco de caldo (no seu defecto un pouco de auga), maicena ó gusto (para ir espesando a salsa) e deixamos mermar. Finalmente engadímoslle o zume de laranxa e os champiñóns.

Cortamos o lombo, colocámolo nunha bandexa e tapamos con esta salsa.





Pódese dar un toque de forno ó final para quentar a mestura.

Bo proveito!

O equipo de cociña